Ofu Anzo dri `i

Ini Rubanga ohwe amani cara olujo asi egbwe si  ri `i ni ote ya?

“Nyindru anzo nyidri ni Opi dri, keya ka ta nya asi ‘a lele ndro rere ri hwe ra.” (Longo 37:4)

1) Rubanga obi ama ana eku ni

“Nyemu `boronzi madri kare cidru ga rii izonzi madri vu `a tia ekore ga ri tro kare aluga… adusi abi ai e`ku hwele mani” (Izaia 43:6-7).

Rubanga obi ama ana retu ni ete le-kendre ta lelego ndrejo ria bakaa lelego kendre retugodru ri ani. Obi ama bajoadru ana loso `i, ana anda `i, ana pelere `i, ana ciri `i vua ana lejo ideka andasi ti cidru kendre dru tua si. A`dusi eku retu Rubanga dri ri karitede ovi anidri anangasi risi. Di koba Rubanga ka laru esu vua amako ama anzo esu tadia rideka dini si. Rubanga obi ama ausi ama ani a`ika ra si eku retu ndro rii karuhwe ani ni.

2) Kole `ba cidru kolu eku Rubanga dri si

"Ta anyia nyale rii anyia mvule rii, ta cidru anyi a idele ri tro, anyide ai cidru eku Rubanga dri si.” (Ofu atijoadru Korinto `ba dri `i 10:31).

Jo Rubanga obi ama eku anidri si, kitedea pelere kole tesa amide ta eku hwedi anini rii au. A`dusi ta ama idele rii ta ana lele amide ri `i. Disidru ta atijoadru ruledi amadri rii konyi Rubanga dri ri eteka ta ana hwele amani ra ria ateka amani ra si. Dii ovi ama Rubanga ni lejo ri `i (Mateo 22:37) vua ama igeni baka ana ruga `i (Ofu atijoadru Yoana `a sile ri `i 5:3-4), vua anzo hweka anini `i (Longo 100:2-4). Dii zo laru cidru ruledi ridri `i, ndrole ama ama wadezi ti leka ndro `i (Koloso `ba 1:4-5).

3) Ama cidru obi eku hwele Rubanga ni ana ruleka ri ani ni kpe

“Ba cidru inziki ra, ai Rubanga `a eku ni ga lolu” (Roma 3:23).

Oluka “Rubanga a eku ni ga lolu `a ehwi ni adu?”Kite`dea ama cidru igeni Rubanga ni vua ahwe anini anzo ana ruleka ri ani ni kuru. Ana retu ate amani kuru vua amaci ana lekaa ri ani ku. Asiti amadri ode tazi bati iru, vua ama ndrea okpo rere si onde Rubanga ni ra, dii ovi laru hwejo ta Rubanga ku rini ri `i (Roma 1:21-23). Idojo enzi a emujo vudri dia risi, geni amadri Rubanga ni igenijo ka amani ta cidru ide wa nidi oe iyo (Efeso 2:3). Dii enzi retu le Rubanga dri ri gajo ri `i (Jeremia 2:12-13).

4) Ama cidru kevu ka lamgba Rubanga dri ri esu ra

“Enzi `a musara ni dra….” (Roma 6:23).

Ama cidru ede eku Rubanga dri ri iga ra. Di ideru ingoni? Ideru ama ta ziti ri leka ana Rubanga ndeka ra si. Anda ako, geni ako tro vua dri okpo amadri risi. Ki Rubanga ni kiza tro ebe ama ama ranzo bobo dru ana eku retu risi. “Lamgba aidri kolu egweka tadru ri `i, a`dusi adi ai ivu Opi ni andra vua ana eku a okpo ni andra angwe.” (Ofu erijoadru Tesalonica `ba ni ri `i 1:9).

Lejo ehwi “aci olure tadru ri `i” nidii Ofu Udi `a ta ojoru driaru vu mudri `a limbi eri-aaru mudri a limbi alu rii Yesu ni anangasi ojo ni. Tadii `ba lejo Rubanga dri ri nzeka vua ta ue`ka nyadu ri bati ojo ta driaru ni ku vua kaki gaa sa kpe. Tadii Rubanga `a Ngwaapi ni dradi layu hwejo enzi `ba cidru ni ri ojo ta driaru rii ni, ojo tadii ni ausi alu unzi angala Rubanga dri ri tro ri kode dru amadri ga ku si. Ki jo aga lejo dii mgbe ri ama gaa ama lali si icandi eji jo ama `i dri.

Kesu jo Bugu Ole ria ta driba nzele ovi `ba dri ri idri ri komba disi ri, ama icandi esuka kolu tadru, ki loso dru ta driba ana nzele ri omba disi ku…

5) Rubanga eze ana Ngwaapi ni alu tende rii lidri olure tadru ri hwere anzo tro

“Le`jo jole dii le`jo loku ri `i, dubasi `ba kpo ka`i ri `i: Kristo Yesu emu vudri di a enzi `ba ari re…. ’’ (Ofu atijoadru Timoteo `a sile ri `i 1:15).

Ofu loso rii Kristo `a draka ama enzi `ba disi `i. Dra driaru ivu onzi lidri di esu okpo dra dri `a rii ra vua ausi awi amani joti lidri olure tadru ridri rii anzo tro ra (Ofu Atijoadru Korinto `ba dri `i 15:20). Di kitedea amani Rubanga ka enzi `ba ai anidri vua kiza ka ani ko aisi `i (Roma 3:25-26). “Rubanga azi ani ausi ari anidri si kengwi dru leti enzi `ba dri ni rebejo ani a`ika si ri `i” (Ofu atijoadru Petro a sile ri `i 3:18). Jo ada dri Rubanga dri ei driaru ri `ia ni ama anzo olure tadru ri esu au.

6) Dra Krsito dri rii ideru `ba aia enzi ni ruka vua ani igenika ri `bati ni

“Anyiru anya enzi ni, anyiko anyengwi Rubanga dri, anya enzi kebe`dru ru ca” (Ebu Maju a idele rii 3:19). “Nya `i Opi Yesu ni anyi anyari `ba nyidri joti ga ri tro ra” (Ebu Maju a idele rii 16:31).

“Enzi ruka” `a ehwi ni ogu ecoka ta ego ego ri iga `i. “A`i” a ehwi ni ta cidru Rubanga a icarale vua ana idele Yesu si ria ateka amani ra `i.. Yesu ojo ma`di ma “ai di” rii ‘‘eyivi oza ku’’ (Yoana 6 :35). Lari amadri ri ohweru amani musara ani ku. Vua adi hwea amani ta loso ama idele risi sa kpe (Roma 4:4-5). Lari Rubanga dri ri ohweru amani kiza si vua a`i si (Efeso 2:8-9). Dride dii ilili (Roma 3:24). Ama tesa dride di esu ra jo andru asi cidru si `i (Mateo 13:44). A`dusi jo amide na ani ri, kitedea tati Rubanga `a ubale ana tacidru bijo ri engwi anda. Eku Rubanga dri rii mgbesa karunzi oru vua koba amasa ama tacidru ama lele anisi rii esu tadru-tadru.

Lejo dia ehwi eriru nyini tau `a?

Ile nyesu anda ta cidru nya lele ridri rii Rubanga `a idekaa Yesu si si ra ya? Jo ile ra, karuni Rubanga ka ebu ide nya lidri ni `a `i.

Kole nyide adu?

Anyeco ogu  tati unzi enzia ubale ba le jo asi `a ri iga. Anyungwe ru Yesu dri rii au anyini layu esujo lumbe enzi dri ria dri ga `i. A`dusi Bugu Ole ri ojo amani “`ba cidru ru Opi dri ri ungweka rii ka rari ra’’ (Roma 10:13). Nyiba asi tati Rubanga a ubale nyini Yesu ni `a risi. Nyinyo lumbe enzi dri rii tati Rubanga a ubale vua ana idele nyini risi. Nyini Bugu ole ri laka nyini tati loso ana ubale nya lidri ni ri asu jo, dii tati loso ana ubale nyi ebejo enzi dri `a kulala ri `i (Ofu erijoadru Petro `a sile ri `i 1:3-4). Nyindru ekelezia lejo Rubanga dri ri aika a`i si ri `bati nyemuru aietro Opi ni ecure ga vua zojo aitro kare aluga anzo ejijo Kristo ni (Filipi `ba 3:7).

Ta reridi loso vu di idri rii oja asi egbwe amadi rini dile  ole ole Rubanga dri ritro iyo `i. Tati Rubanga `a ubale amani Yesu si ria ateka amani ra koba eku retu ri karuhwe Rubanga ni.

“Nyeya nyi ma ni leti ma ji’di lidri ga ri itede ra; nya oluka aa ito ma anzo si, ma oluka nyi laga eji mani asi egbwe tadru ri `i.” (Longo 16:11)


Ritedeka “Aci Olure tadru” ridri Ofu Udi `a ri `i

Ki majo tadii anyini, jo ma`di anya dudi ana adrupi a ruga rii, kemu ka ti na ingwi lokiko andra, jo ma`di ojo ana adrupi ni ‘lali,’ kemu komba lokiko retu ri andra ra, vua jo ojo anini ‘Nyi ababa dipi!, kemu ka ti na ai aci olure tadru ri `ia. (Mateo 5:22 Yesu ojo lejo dii ni).

Yesu ojo….Jo nya mi nyare ga ri ka nyiji enzi ‘a, nyenze nyibe pi. Nya ewo alu dia egweka ni oza nyi beka ndutu dru aci olure tadru rii `a ni ra. (Mateo 5:29)

Vua jo nya dri nyarega ri ka nyi ji enzi `a, kole nyili nyibe pi, amala nya ewo alu dia egweka ka icandi hwe ga, oza nyi beka ndutu aci olure tadru ri `ia ni ra. (Mateo 5:30 Lejo dii Yesu ojo ni)

Ori `ba `ba ru dika au, ki endri ‘dika kpe ri`ba si ku; rarii anyori ma`di ru `be`di endri tro eritruwa aci olure tadru ri `ia risi. (Mateo 10:28 Yesu ojo lejo dii ni)

Vua jo nya mi oba nyide enzi a, nyenze nyibe pi. Dari nyihwi lidri olure tadru ri iga mi alu tro, oza nya hwika mi eri trwa tro aci olure tadru ri `ia ni ra. (Mateo 18:9 Yesu ojo lejo dii ni)

“Andra unzi anyi laponyi Cara Mose dri inika ri ni Farazei `ba tro, anyi dranga! Anyi aci nya nya meri `a si, vu cidru dri si `ba eco si koko ki dru anya vu `i, jo anyeco ai ra ri, anyi`ba kaki aci olure tadru ri esu anyidri ani vu eri.” (Mateo 23: 15 Yesu ojo lejo dii ni)

 “Anyi ini! Vua ini `boro! Lamgba anyidri aci olure tadru rii a`dii anyi unaa ingoni? (Mateo 23:33 Yesu ojo lejo dii ni)

Vua jo nya dri ka nyi ji enzi a, nyili pi. Da rii nyihwi lidri olure tadru ri iga dri alu tro oza nya hwika aci olure tadru ri a dri eri tro ni ra, laka obu ka nyi nya bo vua aci sa ka nyi gwe bo. (Maruko 9:43 Yesu ojo lejo dii ni)

Vua jo nya pa ka nyiji enzi `a, nyili pi. Da rii nyihwi lidri olure tadru ri iga pa alu tro, oza nya hwika aci olure tadru ri `ia pa eri tro ni ra. (Maruko 9:45 Yesu ojo lejo dii ni)

Jo nya mi isa ka nyiji enzi `a, nyenze pi. Da rii nyihwi Opi Rubanga dri iga mi alu tro, oza nya hwika mi eri tro aci olure tadru ri `ia ni ra. (Maruko 9:47 Yesu ojo lejo dii ni)

Ma’di orile rii ma ite`dea anyini ra : Anyori Rubanga au, a`dusi ana anyi dika ra `a vuga ; anidri okpo anyi bejo aci `a rii `aa. Lokudru majo anyini, ori ka anyi ko ausi wa. (Luka 12 :5 Yesu ojo lejo dii ni)

Ana olure kare `ba drakara ridri ri i`a rii, ondre nga oru, ondre Abaramu ni lolu ai Lazero tro. (Luka 16:23 Yesu ojo lejo dii ni)

Ledra ni aci ani, ledra ni ama ru niga ewo unzi ri `i. ka ru ivolo ndutu, ka aci edu aci olure tadru ri `ia, lidri amadri ndutu rii igwejo. (Yakobo 3:6 Yesu ojo lejo dii ni).

Rubanga e`be alusa malaika andraa ana dri ni atuka ra rii lamgba ako ni kuru, o`be ai aci `a, umbe aia dri ni nyororo si vu ini tiri ri `ia ci, kaki o`du lejo alijo ri te. (Ofu erijoadru Petro `a sile ri `i 2:4)


Lejo ebule ofu di sijo ri eduru Bugu Ole ungwele New International Version® ri `ia. Osiru nai kinya 1973, 1978 vua 1984 si, `ba Bugu ole NIV dri sika ri `bati osi ni vua cara laka ri isa ohweki ni. ‘Badini Cara ohweru ra America `a vua vu ndutu dri. Lemu lejo Rubanga dri ria dri ndreka vu ndutu dri ungwele (International Bible Society) ri ohwe aini okpo dii ni.

©2014 Desiring God Foundation. Used by Permission.

Permissions: You are permitted and encouraged to reproduce and distribute this material in its entirety or in unaltered excerpts, as long as you do not charge a fee. For Internet posting, please use only unaltered excerpts (not the content in its entirety) and provide a hyperlink to this page. Any exceptions to the above must be approved by Desiring God.

Please include the following statement on any distributed copy: By John Piper. ©2014 Desiring God Foundation. Website: desiringGod.org